Texte 01 : Mi p'tite cousène

	Mi p'tite cousène
	Lès bèlès djoûrnéyes o ridant, Djè lès-a-ieû mès quatôze ans Dins nosse viladje télemint plaîjant.
	Chîje dins l'maujone; brâmint dès tautes ! Addé li stûve on djoûwe aus cautes : Li dîmègne, c'èst fièsse po nos-ôtes.
	Mi cousène, di mi esteûve sote. Ni sondjant nin d'trop à dimwin Nos-avins come catchète li djârdin, Voltî d'zos l'pleuve come caracoles.
	M' djolîye cousène aus quèwètes brunes Aveûve on rîre si doûs por mi. È scole lon d'lèye jusqu'à sèmedi! Dj'aureûve dwârmu li nêt d'zos l'lune.
	N's-avins sopè tortos èchone - jate di cafè èt do boudin - Èt quand s'ont lèvè lès parints Bin rate nos-avans quitè l'maujone.
	On grand uch sèrè su l' tch'min. Asto, su l' prè padrî one aye On banc d' cru bwès po Moûse qui saye Di nos lèyi nos donè l' mwin.
	Moûse clapote èt dischure si rôbe Tchapotant su lès mârches di pîre. Por one bauchèle, padrî l' baurîre Ç'a-t-arivè on djoû d'octôbe.
	I gn-a dès fleûrs didins lès spènes. Su l'ièbe, en nos strindant bin fwârt N's-avans lèyi tchantè nos cwârps : Dj'a rabrèssi mi p'tit cousène.

	© Georges Puissant. 28 fèvri 1978