Texte 17 : A l' discombe

	A l' discombe
	Ribatûwes pa l' solia, lès-awin.nes brûtiyenut D'zos lès dwègts d'on tiène vint scrèpant leûs djanès tièsses Po sayi d'atrapè dès sprûwes qui roufléyenut Di bric èt d' broc, come on baudèt après dès wèsses.
	Spotchîyes pa mès botines, lès-ièbes s'asplatichenut En fiant lèvè l'inéye di pwève dès fouyes di minte Jusqu'à dès tinrès boles d'alènes qui s' ricrolenut À l' copète di blankès-ôrtîyes dilé l' pîsinte.
	Tot d'on côp, là, su l' têre d'on chayon, divant mi, Come on lîve, a couru l' grande ombe grîje d'on-aviyon. Su pont d' timps èle si tape dins mès pîds è frumeji, Come one djon.ne fouye di plope avou l'éye d'on mouchon.
	Il a falu qui dj' clôye li bètch, mi l' gros tateleû : Dins li rèsplot di mès deûs mwins èle s'a catchi. Mès mots à tot spiyi, ça lî fieûve awè peû. Aviè l' viladje è nosse corti on-a r'paurti.
	Mi bèle ombe grîje î a faît s' nid dins dès bouchons Su dès brokètes di sauvadjes côres tchèyûwes à l' têre, Addé dès vîyès nwârès fouyes è d's-aubwissons, Où c' qui totes lès masindjes vègnenut po fè plandjêre.
	Nosse bonheûr, il èva ou i d'meûre : libe come l'ombe ! Dins dès r'cèpes, asto d' l'aye, on n' li sét ractinu. I florit bin sovint sins nos l' dîre, à l' discombe ; Quand on dâre po l'awè, on l'a dèdja pièrdu.

	© Georges Puissant. 1979