Texte 23 : Ritrèssadjes

	Ritrèssadjes
	Li dêrin pas a stî l' pus deur Vo-m'-là portant didins tès meurs. Li cwade do satch dissu lès spales A cauvelè one pitite ruwale, Maugrè l' paletot qui sint l' batia. Trwès-ans au lon po riv'nu là !
	Pârdon po lès djoûs d' bîje èt d' frèd Avou pèrson.ne po soyi l' bwès.
	Mès tch'fias ? Asteûre dj'ènn'a bin wêre, Is-ont tchèyu su totes lès têres. I-gn-a dol nîve su lès dêrins, Come dol fumêre su on vî trin. Ni cache nin tant après l'ôte brès : Li seûl qui d'meûre èst là por twè.
	Pârdon po lès djoûs sins farène Avou pèrson.ne dins nosse cûjène.
	Dj'ètind couru on p'tit-èfant Qui braît èt tchûle après s' moman. I faut rademint lî alè dîre Divant qu'i n' mousse èt qu' ça n' seûye pîre À veûy véci on drole come mi Qui l'a bêrcè divant d' paurti.
	Pârdon po lês nêts d' maladîye Avou pèrson.ne quand l' raupin crîye.
	Dji sus to scrans, mès djambes pèsenut Et là mès-ouys qui picotenut ... - "Si dj' vou m'achîde su one tchèyêre ? ..." - "Non.na, èt co mwins' fè plandjêre : "Dji m'a tant èt tant agrançi "Do ièsse avou twè à ç'-t-eûre-ci!"

	© Georges Puissant. 1980