Mi mèyeû maîsse | ||
IDji n' tè l'a wasu dîre divant : Mi mèyeû maîsse, ç'a bin stî twè. Dispû l' wayin di-d-là trwès ans, V'là co dès nuk didins mès brès ! | ||
|
Èle èst r'pindûwe, li novèle fau ! Dêrène lèçon, mins li pus bèle : Dins lès burutes èt lès cayaus Dji flacheûve ! Djoû d' fièsse sins dringuèle ... | ||
|
Maugrè qui t'as brâmint suwè Dins li p'tit prè padrî l' corti Ti m'as mostrè comint fènè. Asteûre ... Sondji qui t'ès r'paurti ! | ||
IIDji n' tè l'a wasu dîre divant : Mi mèyeû maîsse, ç'a bin stî twè. Dispû lès poûsses di-d-là dîj ans, Lès-aubes ènn'ont-is faît do bwès ! | ||
|
Il èst r'pindu, li vî locèt ! Si deure lèçon, mins li pus bèle : Avou plin d' têre à mès solès Dji s'potcheûve ! Djoû d' fièsse sins dringuèle ... | ||
|
Maugrè qui t'as stî bin nauji Po fès lès rôyes di nosse djârdin Ti m'as mostrè comint fouyi. Asteûre ... Por twè, pupont di d'mwin ! | ||
IIIDji n' tè l'a wasu dîre divant : Mi mèyeû maîsse, ç'a bin stî twè. Dispû l' èstè di-d-là vint'-ans Mès coûtès djambes ont fwârt boutè ! | ||
|
Èles sont r'pindûwes, lès grandès banses, Preumêre lèçon, mins li pus bèle : Nin co dandji do fè chonance, Dji douweûve ! Djoû d' fièsse sins dringuèle ... | ||
|
Maugrè qui ti n'esteûve pus p'tit Po ramassè les canadas Ti m'as mostrè comint s' bachi. Asteûre ... Dji n' pout pus criyi : Pa ! | ||
| © Georges Puissant. sètimbe 1981 | ||
|
Retour au menu : Textes wallons Retour au menu : Pages personnelles |