Texte 32 : Po lès canlètes

	Po lès canlètes
	Mètoz qui dj' su pa côp maulaîr, Qui dji n' su pus tot l' timps d'assène, Mètoz avou qui dj' su pawène, Qui dj'a lès-ouy sovint è l'aîr. Mètoz tot ça su vosse blanke fouye Èt vos n'auroz co rin dit d' mi.
	Mètoz qui dj' n'a jamaîs d' crèvate, Qui dj' n'a l' papî qui po l' vélo, Mètoz todi qu'i n' faut nin m' bate, Mètoz l' coleûr di mès saurots. Mètoz tot ça su vosse blanke fouye Èt vos n'auroz co rin dit d' mi.
	Mètoz qui dj' n'a qu'on p'tit mèstî, Qui dj' su binauje quand i va ploûre, Métoz qui m' feume, djè l' veu voltî, Mins qu' mès trwès gates n'ont wêre di foûre. Mètoz tot ça su vosse blanke fouye Èt vos n'auroz co rin dit d' mi.
	Mètoz qui dj' bwès voltî one bîre, Qui chaque dîmègne dji prind l' locèt, Mètoz ossi qu' ça m' plaît bin d' lîre, Qui dj'a portant dès gros solès. Mètoz tot ça su vosse blanke fouye Èt nos n'auroz co rin dit d' mi.
	Mètoz qu' por mi l' cwârbau èst bia, Qu'i gn-a pont d' caurs didins m' gurnî, Mètoz qui c'èst d'asârd ... Auwe, waîtoz vosse fouye ... Tote nwâre ! Èt dji n' vos-a co rin dit d'mi.

	© Georges Puissant. octôbe 1982