An.yéye-miraukes | ||
IAyi, miraukes. Èt nin dès p'tits, di d'là dès cints ans, non.na ! Dès gros, dès novias, quausu tos lès-ans ! Po n' nin vos fè transsi, dji m' vos lès va sploussi onk après l'ôte. Li prumî s'a passè nin lon d' èmon Abrahâm. On nom tot tchwèsi, don ? I gn'aveûve là on fwârt grand maronî. Po lès-èfants, pinsoz, si c'esteûve one djôye : dès grandès fouyes pa moncias po bèrôlè d'dins, èt des frûts po fè dès bèdots avou quate alumètes ou dès p'tits batias à mète dissu Moûse. Mins on djoû : pupont d'aube ! Mirauke, vos di-dj'! One miète pus taurd, ç'â stî su l' place, po li bèle rindjîye di tiyous. Quand vos m' lîjoz, ça n'a l'aîr di rin, portant, li tiyou, n'èst-ce nin li pus bia dès-aubes d'amon nos-ôtes ? Waîtoz : dès fouyes vètes èt ardjint qui frumjîyenut dins lès dwègts do vint èt tapenut come dès spitûres di solia; dès fleûrs à-z-atirè totes les mouches d'api do viladje; èt sèrviauve avou ça ! Mi, quand dji n' v'leûve nin alè è scole, dji rabrèsseûve l'aube èt i faleûve ièsse malin po disloyi mès p'titès mwins sèréyes dins lès crèvaudes do l' sicwace... On djoû ou one nêt : mirauke ! Li mitan èvôye ! Après : li toû do parc' d'An.yéye avou l' sapin dès-amoureûs, lès tch'mins couvièts d' cindréyes, on pont d' bwès qui fieûve li gros dos dissu l' Molignéye .. Tot, tot vos di-dj' ! Tot î a passè ! D'on plin côp ! Rinièti ! Èt po mostrè qu' An.yéye aveûve li pompon, saqwants mwès après, tote li rindjîye dès-aubes li long do l' montéye do pont su Moûse a lèyi l' place à ... rin. Portant, qui c'èsteûve bia, si canton-là ! Alôrs ? An.yéye-miraukes, n'èst-ce nin l' vraî ? | ||
IILi rûwe do l' Libèration pinseûve ièsse sipaurgnîye. Non.na ! Tos lès mèlêsses, èvôye ! Sins moti. Là, ci qu'i gn'a ieû d' fwârt, c'èst qu'avou lès-aubes, tos lès djeus dès-èfants ont stî rèbârquès. Nos v'là avou on dobe mirauke, sâcrè godome, come dijeûve mi pârin. Mins djustumint, c'èst l' dobe mirauke qui nos-a sauvè. Enfin, qu'a sauvè lès djeus dès-èfants. Pinsoz, c'èsteûve di trop lès-aubes èt lès djeus. C'èst po ça, por mi, qu'on a r'trouvè saqwants djeus one miète pus lon asto dès man.nèstès dès campeûs. Dispû, lès p'tits-èfants djoûwenut dins lès vîs papîs, èt lès parints vègnenut s'achîde dins lès bonès ignéyes dès pèlakes qui tchamossenut. Li dêrin mirauke a stî fè à l' baube di ... Sinte Baube ! E v'là one qu'aveûve si rûwe bin paujêre. Bèrwète ! Ti v'là tote nûwe ossi, sins lès-aubes ! Po lès fièsses do l' Bèljique, dins brâmint d' viladjes on-z-a r'plantè dès-aubes. A An.yéye-miraukes, is sont quausu tortos èvôye. Scrotès ! Poqwè ? Tènoz, dji m' va èvoyi mile francs à nosse mayeûr po qu'on r'plante on gayî nin lon dès scoles. Poqwè ? Pace qu'on viladje sins-aubes, ça èst laîd, ça èst mwârt, ça èst quausu come one autoroute. Mins poqwè on gayî ? Po djouwè one pitite quinte à nos maîsses di scole : vèyoz ça, tos lès-èfants qu'arivenut à scole avou do r'târd. sins couru, mins lès massales totes rodjes èt lès potches rimplîyes di bonès gayes ... Qu'è pinsoz, vos-ôtes ? | ||
| © Georges Puissant. avri 1984 | ||
|
Retour au menu : Textes wallons Retour au menu : Pages personnelles |