Texte 40 : Autone

	Autone
	Li câlme si stind ètur lès ayes, tos lès cortis èt lès maujones, Pausse qui rinfèle. Asteûre li feu s'a distindu. L'èstè frèmit. One sinteû rôle, à mitan fouyes, à mitan frûts. One sinteû lève, à mitan têre, à mitan bwès. Li bleuw do ciél n'èst pus parèy. I s'a brouyi come l'êwe d'on fleûve qu'on frèd courant rimûwe pa-d'zos.
	Dj'aleûve mi rabachi. Èt volà d'vant mès-ouy one tène lumerote qui tron.ne èt s' distind, come one baloûje. Li vint l' ralume. S' amûsereûve-t-i ossi là-wôt avou dès stwèles ?
	Non.na, vî nuk ! C'è-st-one djane fouye dins l' pus bia d' tès bôlîs ... Come s'i pwârteûve on p'tit èfant qu' vint s'èdwârmu avou one gote di tchôd lacia ètur sès lèpes, li bôlî n' wase pus rèspirè.
	Qu'aurîz-faît vos à s' place, avou l' preumêre djane fouye ? L'autone èst là, môde di rin.

	© Georges Puissant. octôbe 1984