Texte 41 : Djoû

	Djoû
	Odéye pa sès voyadjes à balzinè dins l' nwâreû, one ptite tchâwe-aus-soris s'a pindu dins nosse neûjî. Èle sitind deûs trwès côps l' fine sôye di sès-éyes èt lès r'plôye come one fouye tote sètchîye, ricroléye pa dès tchankes èt qui grûcîye pa momints. À l'ètinde, on mouchon à mitan rèwèyi zoubèle èt s'èware, pwis tape do bètch come po v'lu ratrapè si tchanson trop timprûwe. Li canton ronfèle co doûcètemint. Portant, ci èt là, come dès s'minces qui lèvenut, dès tchanterîyes trawenut l' nêt. Li lune riprind si nwâre cote sitindûwe dissu près èt viladjes. Dins l' ciél qu'a blanki, one sitwèle a d'meurè. Djouweû d' cautes qui s' rovîye, po l' paurt dès tchèts ! On bidon vint d' sonè come one èglume : li lacia va stritchi tchôd moudu ètur lès dwègts d'one cinsèresse qu'a douviè lès batants d' bwès di l'uch d'on vî stauve. Por mi, èle a d' meurè sins rin fè, su l' sou, timps d'on plaîji, à s' lèyi carèssi pa l' tchaleûr qui potcheûve foû do trau en frotant dissu s' cwârps : dj' a vèyu one tchôde bole qui coureûve pa-t't-avau lès pachis, sinteû d' sauyes èt d' sofla di vatches èt d' bèrbis, po v'nu s'arokè conte li meur d'one tchapèle où ç' qui trwès p'tits câraus r' glatichenut d'zos l' solia.

	© Georges Puissant. 1984