Texte 42 : Nêt

	Nêt
	Dispû on bokèt, on nuwadje si froteûve tot-autoû do l' plin.ne à l' copète dès crèstias, come one séye su one pîre. On coucou tchante. Li vint boute li nuwadje dins l' solia, qui tron.ne èt ratche dès gotes foû do l' kèrnache. Vo-lès-là qui tchaîyenut èt s' brîji dins l' bruwène ascropûwe asto d'on laudje soûrdant. Dès spitures di coleûr si r'tapenut dins on bwès où ç' qui l' solia va moru. Sins ratinde qui tot seûye faît, on blanc rîre bèrôle ètur ciél èt payis : li lune. Li lune, binauje come one bauchèle à s' preumî bal, fine sote d'awè l' nêt rin qu' por lèye ! Li lune qui vout spatè su rin d' timps lès dêrènès scrabîyes do rwè d'ôr abatu. Vélà, dins l' bwès, one saqwè s'a twârdu, come on lapin dins one boûsse. Dji triyane maugrè m' paletot. One pîlerîye, qui d' n'ètind nin, a passè, come one bûse qui planereûve. Lès bèdots racourenut. À l' cwane do bwès, one cope di chèvreûs pète èvôye en zoublant. On dérin sofla, tène, faît frum'ji dès bouchons èt lèvè dès cwârbaus avou dès "crââ" rimplis d' carèsses. Li ciél divint keûve pwis nwârit.

	© Georges Puissant. 19847