À l' fièsse di s' vî grand-pa | ||
|
V'loz wadji qu' vos n' l'avoz nin vèyu d'zeûs l' foto pace qui c' n'èst nin por lèye qu'on fieûve tot ça, èt qu'èle èsteûve su l' costè, sins noû mantia èt sins sorîre ? V'loz wadji qu' vos-avoz seûlmint r'waîti lès grands èt lès vîs qui soriyin.n po mostrè qu'is sont binaujes èt po lèyi one bèle imaudje ? | ||
|
Lèye, èle n'a nin ieû dandji do sorîre. Avou sès tch'fias qu'èle n'a nin cwèfè - nin come si soû todi -, avou sès grands-ouy douviès tot laudjes, avou s' visadje qu'on vôreûve tinu didins sès mwins, èle èst si bèle insi. Maugrè qui vos n' l'avoz nin bin r'waîti en douviant l' gazète, maugrè qui vos-avoz toûrnè ratemint l' pâdje po-z-alé lîre pus lon, lèye, c'èst l' djoû qui vint. Lèye, avou sès grands nwârs tchivias ècomèlès dissu sès spales, c'èst l' mwin qu'on tint su lès dicauses, c'èst l' dimwin qu'on ratin, maugrè lès lârmes quand on s' coûtche di truviès su l' lèt à si d'mandè poqwè qu'on vique. Ci bauchèle-là, djè n' èl con'chrè may, mins quand c' sèrè m' toû d'ièsse vî pa, pôreut valu qu' gn-eûye one crapôde come citèllale dissus l' foto. | ||
| © Georges Puissant. 1986 | ||
|
Retour au menu : Textes wallons Retour au menu : Pages personnelles |