Texte 46 : Èstè

	Èstè
	On moncia d' ranches sètchîyes a lachi pa-t't-avau l' têre riniètîye one bande di barbaujes come dès gaîys blancs bèdots. Avou m' rèstia dj' è vou tchèssi saqwantes qui zoubèlenut addé lès porias, come po-z-î v'lu agritchtè leû lin.ne. Volà poqwè qu'on sinterè l'inéye dès breûjes quant i ploûrè, dimwin ou on-ôte djoû.
	Li moncia pète èt chufèle. À l' copète dès burtons, do djeus djèmit, qui tchaît gotes après gotes dins l' fornia en frîlant. Ètur lès brantches di deûs mèlêsses, li fumêre a pindu come one drole di buwéye qui s' disfligote à tot momint. Li vint grawîye didins lès cindes.
	O mitan do prè, on djon.ne pomî avou l' solia pindu aus couches a bin dès rûses po rastinu ci rodje frût-là. Ça a trompè on bwagne mauvi qui n'a trouvè qui vètès pomes. One pouye codausse, binauje d'awè bribè one grosse amande au-d-truviès dès vîs fils. Mins èle s'arète : li clotchî tape saqwants pièles di musique po strîlè one ribambèle di gris pidjons. Por mi, is toûrnin.n trop longtimps à s' môde asto do coq.

	© Georges Puissant. 1986