Texte 47 : Iviêr

	Iviêr
	Li djaléye a tchauborè mès finièsses. Dji sofèle o mitan do blanc payis dèssinè su l' cârau, là où s' mosture come on tot p'tit vèvî. On tot p'tit vèvî avou d' lêwe qui fronce, coleûr di clér lacia. Mins volà qu'au-d'-truviès, one pièle di lumiêre si cocheût, blawetéye. Si distind ? Non.na ! Li vèvî a clèri po m' mostrè là dins l' fond trwès grands-aubes : lès tiyous d' nosse djârdin...
	Tot comptè, ni direûve-t-on nin qui c'èst mi qui l' djârdin r'waîte pa l' trau d'one sêre ? Mi qu' èst véci dins l' maujone, prîj'nî do l' nîve èt do frèd, èt dès grands nwârs dwègts dès tiyous drèssis ètur mi èt l' iviêr. Come po dîre qui c'èst bin ça qu' èst l' vraî, one binde di sprûwes pète è l'aîr là pa-d'zeûs l' poli. Libes !, nin mi ! Lès sprûwes ridenut dins l' ciél èt si r'tapenut su l' tas d' cindes. Gn' aureûve-t-i ossi do wârglas po lès éyes qui claquenut ? Sobayi ?

	© Georges Puissant. 1986