Djeu d' grands | ||
|
Vos p'loz lachi dès " É ! Rastrinds", Dès " Ti n'î conès rin", Vos p'loz bin rîre, dji tron.ne di peû Èt dji n' su nin tot seû : Choûtoz l' clotchî qui sone Po qu'on s' rèssère dins lès maujones. | ||
|
Au posse, on dit d' clôre lès finièsses, Do fè rintrè lès bièsses, Do clawè l'uch su lès-èfants Èt do lèyi montè l' djârdin, Mins si asteûre dj'a co do pwin, Dijoz-m' po d'mwin ç' qui nos mougnerans. | ||
|
Avoz pinsè à nos mouchons Ca li nuwadje n'èst pus fwârt lon ? Comint aloz lès-èspétchi D'alè co bwêre didins lès ris ? Voz n'avîz nin sondji à tot ? Il èst trop taurd, vos compurdoz ! | ||
|
Dji m' rafîye di vos veûy tchûlè. Si vos sèrîz tot seû à tapè su vosse dwègt, Ci n' sèreûve qu'one pasquéye di pus, Mins vos n's-avoz quausu pièrdu À fè l' Monsieû, li grand "expêrt", Li maîsse dès "Centrales nuclèyêres". | ||
|
Choûtoz l' clotchî qui sone Po qu'on s' rèssère dins lès maujones. | ||
| © Georges Puissant. fèvri 1987 | ||
|
Retour au menu : Textes wallons Retour au menu : Pages personnelles |