Sicilia | ||
|
Dji n'a qu'on coeûr, T'as pris l' mitan. I s' lome asteûre Borgo Lupo ou Minéo. Il a dès-ouy come dès neûjètes Èt dès nwârs tch'fias Come lès bauchèles ènn'ont vélà. I tchante tofêr tot s' pormwinr'nant Dins tès ruwales di p'tits pavès Qu' faîyenut ridè Lès gris mulèts. I prind plaîji Avou l' vèjin qui mougne su l' sou, Avou lès djins Su lès martchis, Avou l' batia, li "Frèccia Blu" Qui nos ramwin.ne todi vêci En dessinant mile èt mile rôyes Dissu lès vôyes Dès bias daufins. | ||
|
Dji n'a qu'on coeûr, T'as pris l' mitan Dins tès pachis di "citroniés" Èt "d'oranjés", Tès blancs viladjes su lès crèstias, Ti têre brûléye pa tant d' solia, Avou Gino èt Paolo Pa-d'zos l' figuié, L'assiète di pâtes à l'ôle d'olive Dissu lès gngnos. | ||
| © Georges Puissant. mârs 1987 | ||
|
Retour au menu : Textes wallons Retour au menu : Pages personnelles |