Visadjes d'èyîr (II) : Lèyontine | ||
|
Dji su-st-achî à l' tauve po fè mès d'vwêrs, èt ça n' va nin tot seû. Dji comache lès cintilites, lès mililites èt tos cès canetias-là. Vèyoz : su l' buletin d' Noyè, gn-aveûve on gros zérô, avou do rodje tot-autoû, en "système métrique". C'èst vos dîre qu'avou lès gotes qui dj' a suwè dispû one eûre, on-z-aureûve sûr èt cèrtin impli totes lès mèseures di ç' man.nèt sistème-là ! | ||
|
Dins l' cûjène, mi man, qu'a lèyi l'uch douviè po m' bin veûy, a rôstè l' drap do ristindadje èt mète tchaufè l' fièr à galètes. Li solia tape au d'truviès dès câraus, jusse dissu l' plat où ç' qui l' pausse infèle. Èt mi, ça dut ièsse mi tièsse qu'infèle, di ièsse rastinu on mércrèdi après non.ne. | ||
|
One chance : l'uch di d'vant si douve ! Lèyontine, one brâve èt bone vèjène vint po dîre bondjoû. Èle a one nwâre cote èt, pa-d'zeûs, on d'vantrin avou tot plin di p'titès fleûrs, dès brôyes di tchèt, m' chone-t-i. | ||
|
Si tchèyêre èst jusse asto d' l'uch, disconte one vîye drèsse. Insi, èle èst 'ddé mi, èt èle mi faît dès chinéyes po m' fè rîre. I n' mi faut wêre di timps po-z-awè fini èt rindji papîs èt crèyon dins l' cârnassiére di rodje cârton ! Ça sint d'djà si bon : su l' grile di fièr, lès galètes sont là, totes tchôdes avou do suc come dès p'titès blankès pîres au-d'zeûs. | ||
|
Dj'a rovyi qu'i fieûve bia èt qu' dj'aveûve ètindu tot-à-l'eûre mi vèjin, Françwès, qui tapeûve dès côps d' martia po one instalâcion qu'on vout èmantchi. Lèyontine trimpe si galète dins s' jate di nwâr cafè; mi, dj' in.me mia do rimpli lès traus avou dol confiture èt do trimpè come ça, dins do cafè avou brâmint do lacia ... | ||
|
Mins d'on randon, mi man s'astampe : - Mâria Dèyi, nos-avans rovyi Artur ! | ||
|
Artur, c'èst s't-ome da Lèyontine. Il a s' djârdin asto do nosse. Min.me qui ça faît pa côp mwaîji m' pârin, pace qui s' fèye lî faît r'mârquè qu' Artur a d'dà mètu sès canadas, ou rayenè, ou ci èt ça ... | ||
|
Mins Lèyontine, sins ièsse jin.néye ou min.me anoyeûse : - Ô, li, di tote façon, lès galètes, i n'in.me nin ça ! | ||
| © Georges Puissant. maîy' 1989 | ||
|
Retour au menu : Textes wallons Retour au menu : Pages personnelles |