Visadjes d'èyîr (III) : Julia | ||
|
On z-aureûve du l' lomè Julia "aus p'tits ninis" ! Savoz d'djà seûlemint ci qu' c'èst qu'on "nini" ? Nos-ôtes, èfants, nos l' savin.n' bin. C'è-st-one sôte di bouboune, come on p'tit nwâr grûzia à got d'anis'. Julia ènn'aveûve tofêr dins on ridant d'one pitite drèsse. Qué plaîji quand èle nos fieûve sine di s' pavéye ! Nos vorin.n' à l' fè tchaîr dins lès trwès montéyes di pîre. Portant, èle mousseûve divant nosse binde di mouchons, pace qu'on n'î aureûve quand min.me wasu alè tot seû! On strwèt colidôr èt, à drwète, one place avou l' drèsse asto d' l'uch, pa-d'zos one grande imaudje. Julia douvieûve li ridant avou dès mwins qui tron.nin'. Quéquefîye di plaîji à veûy nos-ouy ! Li trésôr èsteûve-là : one pitite bwèsse di fiêr. I faut sawè qu' dins lès p'tits botiques do viladje, on n' vèyeûve nin ostant d' boubounes qu'asteûre, rèvolpéyes dins dès satchots, dès papîs d' coleûr, dès bwèsses di plastic à fè toûrnè l' tièsse sins sawè l'quéne prinde ! Non, c'èsteûve pus simpe, quéquefîye mèyeûs ossi : do régulus, saqwants biscwîts, dès "ninis", dès balons d' Toûrnaî èt co saqwants doûceûrs èt rin d' pus. Adon, quand on vèyeûve li bwèsse di fiêr si douviè, nos dwègts î alin.n' avou dès frumejîyemints. Après, li bwèsse èsteûve rimètûwe bin à s' place. Nos-èstin.n', por on momint, tot paujêres, à r'waîti d' tos costès : li tauve pa-d'zos l' finièsse, li lèt si wôt qu'i nos-aureûve falu one chaule po-z-î alè coûtchi, li crapôd avou dès pîds come dès pates di liyon, èt asto, li pani d' bolètes di papî. Ayi ça ! Dins ç' timps-là, lès djins èstin.n' come dès-ècologisses. On mèteûve trimpè lès papîs dès gazètes dins d' l'êwe avou dol bolîye. On z-è fieûve dès bolètes en sèrant fwârt èt on lèyeûve sètchi : v'là po s' tchaufè, tin ! Timps qu' nos rwaîtin.n' tot-autoû, Julia è profiteûve po r'ssèrè s' chignon d' gris tch'fias èt s'assîre dins l' fauteuy. Nos-ôtes, on s'astampeûve asto d' lèye pace qu'èle esteûve one miète curieûse èt qu' èle in.meûve bin sawè quî ç' qu'aveûve tchantè èmon l' Pìlau, dîmègne après mèsse, ou l' pris dès canadas èmon Bajart ... ou bin ci ou bin ça ! Contints, nos ôtes qu'on nos choûteûve por on côp, èt sins nos bèrdèlè èco ... Nos plin.n' fè l' gazète èt dîre tot ç' qui nos avin.n' oyu è nosse maujone ... èt tchic èt tchac ! Et on causeûve chaque à s' toû, fuche-t-i di s' famile, fuche-t-i d'on vèjin ! Sâcréye Julia, va ! | ||
| © Georges Puissant. awous' 1990 | ||
|
Retour au menu : Textes wallons Retour au menu : Pages personnelles |