Visadjes d'èyîr (IV) : `Zorglub` | ||
|
Ètur Moûse èt l' maujone, on grand pachi a stî fautchi. Ènawêre, c'èsteûve on paradis po lès bèdots. L'èstè èsteûve au pus bia : li solia a ieû rademint faît do sètchi lès-ièbes. I n' faleûve d'alieûrs nin taurdji : lès preumîs campeûs alin.n' arivè à Anyé.ye ! Quéne fièsse po lès djins do viladje do veûy disbalè lès canetias dès-automobiles, plantè lès pikèts èt monté lès twèles. O ! nin brâmint, savoz ! Quéquefîye iût' ou noûf', li preumî sèmedi ! Aviè mil noûf cint cinquante, veûy dès djins v'nus d' Chârlèrwè ou bin d' Lîdje, po dwârmu quausu su l' têre, dins on pachi qui sinteûve bon l' foûr, por on raupin, c'èsteûve come s'i vèyeûve dès sauvadjes ! Mins ça n'a wêre frapyi : on-a-ieû rade faît do comprinde qui cès sauvadjes-là n'èstin.n' nin pus laîds, ni pus mèchants qu' lès cias do viladje. Is-avin.n' avou zèls dès bauchèles si djolîyes èt si djintîyes ! Ayi ! V'là asteûre do novia ! Qu'èle si lome Mârtine di Fârciènes ou bin Arlète di Fleûru, li vîye èst candjîye. Li vîye èst candjîye po tote li rûwe, po tot l' monde. Li p'tit botique d'à costè èst tofêr rimpli, on dwèt min.me fè l' file dissu nosse pavéye en ratindant s' toû, po-z-î-p'lu moussi, tins ! Èt ça faît plaîji à m' pârin qui tape one divise avou onk ou l'ôte. Tos lès djon.nes si rachonenut asto dès bancs, ou po fè do l' grande balançwêre, tote novèle mètûwe. On djoûwe au volant dès-eûres ètîres. Mi pa a apwârtè on laudje biliârd dins l' garadje; on faît dès concoûs, dès-èquipes ... èt on s' tchwèsit tofêr lès min.mes po ièsse èchone co pus longtimps. Li dîmègne, li fanfare done on concêrt èmon Deville, dissu on bia kiosque tot flori. Comint v'loz, après ça, n' lès nin aurdè dins s' coeûr come dès-anéyes di fièsse ? Èt l'amistè ètur lès campeûs èt nos-ôtes : come si vosse famile, d'on randon, grossicheûve d'one pèkeléye di djins ! On con'cheûve bin Augusta, si frére èt l' famile, come tant d's-ôtes. D'âlieûrs, Augusta s'a mâriè avou l' fi da Rachèl, à deûs maujones di d' ci. Vèyoz come tot a stî candji. Mi, dj' èsteûve tofêr dins one tente ou l'ôte, à r'waîti quî ç' qu'ariveûve, ou bin à r'lavè l' salade dizos l' robinèt avou Mârtine ... ou à s' calonè avou lès canadas qu' Anîye diveûve pèlè avou s' grande soû. Vos compurdoz qu'i faleûve lomè one saquî po fè rèspèctè l'ordre, tinu lès-autorisâcions, èt ... couru après nos-ôtes quand nos duv'nin.n' pâr trop èrnaujes ! Cit-ome là, ç'a stî Françwès, qui n's-avans lomè `Zorglub` come li laîd mama qu' nos vèyin.n' dins li "Spirou". Portant, Françwès n'èsteûve nin mèchant, savoz ! Seûlemint, dins nos-istwêres, i nos faleûve awè one saquî po nos fè awè peû rin qu'en l' vèyant. Si feume, lèye, nos fieûve acouru dins s' tente po nos mostrè lès bèlès poupèyes qu'èle èmantcheûve, avou dès bias blonds tch'fias, dès rôbes di dintèle, èt dès-ouy avou do nwâr ou do bleuw tot-autoû come totes lès djon.nès fèyes ènn'ont asteûre. C'èst po ça qui l' dîmègne, dol vèsprèye, li vîye pirdeûve on mwaîs gout quand l' camp s' wîdeûve di totes lès familes. À braîre, pa peû di n' jamaîs pus s' riveûy ! Rintrès o l' maujone, nos choûtin.n' "Radio Jeunesse" ou bin "La famille Duraton" au gros posse di radio. Ètur lès tentes, `Zorglub` ... o pârdon ! Françwès, quausu mièrseû, passeûve èt r'passeûve prèt-à fè dès sorîres à tos lès-èfants qu'il aureûve rèscontrè ... | ||
| © Georges Puissant. avri 1991 | ||
|
Retour au menu : Textes wallons Retour au menu : Pages personnelles |