Pitite toûrpène | ||
|
Pitite toûrpène si va lavè. Po l' dècidè, ça n'a nin stî tot seû, savoz! Il a quausu falu li cotchèssi d'one tchambe à l'ôte, mins asteûre c'èst bon : li p'tite liyone èst dins mès mwins. Li grande bassine a stî rimplîye d'êwe, èt pitite toûrpène a brokè d'dins. Asteûre, nin dandji di montè l' garde po-z-èspêtchi nosse fèye di potchi foû do l' bassine. C'èst l' contraîre! Dès-eûres ètîres, qu'èle î d'meur'reûve, timps qu' l'êwe èst tchôde, todi. | ||
|
Après saqwants munutes, timps d' rafrèchi sès-ouy, si nèz èt sès tch'fias, timps di s' coûtchi dins l'fond,
èt c'è-st-on pèchon qui plonke èt plonkè didins les wagues.
On n' veut pus qu' deûs p'titès rondès fèsses qui r'pud'nut l'aîr tènawète. Èt ça spite, èt ça rispiste. Ça stritche èt ça wachote. Faut d'meurè lon, èt r'waîti ça sins v'nu asto. | ||
|
Après ça, pitite toûrpène a-st-atrapè on pani rimpli di totes sôtes di canetias. Qué daladje! Dès laîds mamas faîyenut l' guêre su l' bwârd do l' bassine, one rodje auto èva dins l' fond, on batia èmwinrne dès bokèts d' gome po noûri one girafe qui bagne come on-ipopotame; èt vélà, c'èst l' savonète, qui r'chone à dol maquéye asteûre, qu'a stî trawéye pa on croyon po fè one grosse rotche où ç' qui one mouwète si vint r'pwasè. Li savonète ? Dji vou bin wadji qu'on nè l' rivièrè pus quand lès maneûves sèront iute! | ||
|
Mins, on-èst là po s' lavè, don ? D'abôrd, jusse quand l'êwe n'èst d'djà pus si prôpe, c'èst bin l' momint do prinde li botèye di savon èt do staurè quausu l' mitan dissu sès tch'fias, ni v' chone-t-i nin ? Li chume rascouve tot, come on vwèle. Dji m'èva, sins rin dîre. | ||
|
One miète pus taurd, l'afaîre dut ièsse faîte, èt dji r'vin su l' tchamp d' bataye. Godome : i faureûve dès botes! I gn-a d' pus d'êwe foû do l' bassine qui d'dins : pitite toûrpène l'a v'lu wîdi avou l' botèye èt saye do rimpli l'évié... Auwe, ci côp-ci : fini d' bagni! | ||
| © Georges Puissant. avri 1993 | ||
|
Retour au menu : Textes wallons Retour au menu : Pages personnelles |