|
| Visadjes d'èyîr (VI) : lès p'tits vêres da Matante Adèle
|
|
|
|
Ni m' dimandoz nin comint ç' qui ç' vîye djin là esteûve do l' parintéye!.
Èfant, on sît s' pa èt s' man don, èmon onk ou l'ôte, sins tûzè, vos savoz bin.
Ça faît qu' nos-alin.n' sowaîtè "li bone anéye" èmon Matante Adèle, dins s' grande maujone, li preumêre
dins l' Rûwe dès Tiyous, one maujone qui m' man dijeûve sovint : "S'on l' pout aurdè pus taurd, ça frè plaîji à onk di nos-èfants".
Ayi, twè! Quand èle a moru, Matante Adèle aveûve rivindu l' maujone èt s' bia djârdin à ... on bolèdjî,
fwârt amichtauve po dîre li vraî, mins nin di nosse famile, todi.
Si v's-aurîz ètindu m' pa : "Èt tot c' qu'on-z-a faît por lèye, tins , èt rin c'èst l' min.me!" avou dès mots,
one miète pus ..., pus ..., dijans, pus fèls...
|
|
|
|
Insi nos-alin.n' rabrèssî nosse Matante li djoû do Novèl An, come on l' fieûve là bin cinquante ans di d'ci.
Ti n'aveûves pont yeû d' swèréye dansante, ni d' grande rèchinchote li nêt do 31. Non.na!
Li nêt aveûve sitî parèye aus-ôtes. Mins li preumî, twè!
Li preumî, c'èsteûve dès couratrîyes pa-t't-avau l’ viladje, dès familes ètîres dissu lès vôyes, dès-uchs au laudje
avou one pècléye di djins qui moussin.n' po bwâre on vêre, mougnî dès p'titès galètes, si rabrèssî, èt, po lès raupins,
sayî d' dîre on bia complumint qu'aveûve sitî s'crît è scole dissu on télemint bia papî! Sins rovyî lès dringuèles dès pârins
èt marènes, brâmint dès pîces qu'on compteûve èt r'comptè tofêr.
|
|
|
|
C'esteûve vôrmint on djoû d' fièsse, mins qué daladje dins lès maujones!
Ça c'minçeûve tot timpe, pa lès près véjins, èt i faleûve rinde li visite, savoz. Â! ça ayi. T'aveûves yeû Rachèl èt
s'-t-ome, i t' faleûve alè èmon Rachèl èt s'-t-ome! Là, t' î rèscontreûves li p'tite Renéye èt Djôsèf divant qu'i
vègnenuche èmon nos-ôtes...
Si v's-avoz compris l' djeu, i vos faleûve après ça passè èmon Renéye èt Djôsèf, mins li vôye èsteûve longue
- trwès cint mètes au d'pus - pace qui ti passeûves pa-d'vant Louwisse, Omêr, èt ... foû d'one maujone,
ti brokeûves dins one ôte, avou on p'tit vêre pâr-ci, on p’tit vêre pâr-là.
|
|
|
|
Po l's-èfants, c'èsteûve do l' sirope, afîye one limonâde, mins quand on-z-esteut pus grand, dji vos léye advinè
comint ç' qui ça toûrneûve. Todi è-st-i qui chaque anéye, lès djon.nes èstin.n' todi one miète pus binaujes à l' piquète
do Novèl-An pace qu' on finit todi pa fè l' toûrnéye sins lès parints don.
On lès rèsconture savoz, èmon Marîye ou Cafonse, quand ç' n'èst nin èmon Cabert, ni v's-è fioz nin, mins c'èsteûve
brâmint pus gaîy insi. Vèyoz l' tâblau : èchone lès cousins èt cousènes, on rintreûve didins l' bèle place d'one saquî,
on-z-î rabrèsseûve tot l' monde èt ... pâr chance, justumint, li bauchèle qui v's-aveûve èvoyî one cârte saqwants
djoûs d'vant ..., on s' doneûve dès novèles èt tchafyî.
|
|
|
|
- "Michèle èt Claudine ? Èles arivenut dins saqwants munutes"
- "Mi c'èst do doû, savoz"
- "Tènoz, èt vos pouyètes, avoz d'dja yeû dès-ous?"
|
|
|
|
On s'achîdeûve asto do l' bauchèle, po fè veûy qu'on-z-èsteûve quausu si "p'tit galant", èt sayî do s' présintè do mia
qu'on p'leut, mins quand on-z-a d'dja faît mwints places, vosse linwe va pus rwèd qu' vosse tièsse, ça faît qui,
pa côps, vos n' savîz pus comint vos rawè.
|
|
|
| -----------------
|
|
|
|
Po riv'nu à nosse Matante Adèle, nos n'avin.n' rin à fè nos-ôtes lès djon.nes, avou lès-istwêres di maujone, ça faît
qu' ç'èsteûve on plaîji d' l' alè veûy. Mins èle pièrdeûve one miète li tièsse, èle ni vèyeûve pus trop clér èt èle
comacheûve lès noms, lès-âdjes èt lès visadjes, à nos fè rîre, surtout quand on-z-a yeû compris qu'on lî p'leûve
dîre à r'vôy, tot moussant foû pa l'uch di d'vant, po rintrè quausu sins ratinde pa l' cène di drî!
|
|
|
|
- "Tins, quî èstoz vos, là?"
- "Mi, c'èst Marîye-Rôse".
On l' lomeûve mwints côps insi, portant c'èsteûve Rôse-Marîye si vraî nom.
|
|
|
|
- "Èt tènoz, Matante, li p'tit blanc vélà c'èst m' frére".
- "Vos-èstoz bin l'fi da Cabert, vos ?"
- "Non.na, Matante, c'èst mi l'fi da Cabert. Cit'-ci, c'èst l'Djan, do l' tchanterîye".
- "Â! dji su bin binauje di vos veûy".
- "Mâria Dèyi, quéne bèle djon.nèsse asteûre".
- "Poqwè rioz, vos là ?"
- "Po rin, Matante".
- "Tènoz, Marîye-Rôse, vos vèyoz mia qu' mi, purdoz lès vêres didins l' drèsse èt sièrvoz
totes cès djins là, don"
- "Ayi, Matante Adèle. Por vos, ci sèrè one "Marîye-Brizârd" come todi ?"
|
|
|
| -----------------
|
|
|
|
Ça faît qui m' soû sièrveûve èt rimpli à faît. Sins minti, i-gn-aveûve dès botèyes di totes lès fôrmes èt di totes lès
coleûrs, èt qui sintin.n' si bon!
Mins atinçion vos-ôtes! Avou Matante Adèle, lès paurts aurin.n' yeû stî mèsuréyes fwârt jusse, mins avou Rôse-Marîye,
pont d'imbaras! Èle vèyeut laudje, fwârt laudje, lèye...
Quand m' soû purdeûve lès vêres à Cinzano po sièrvu l' Bènèdictine èt qu' v's-avîz d'dja yeû l' matinéye po comachî
do l' liqueûr di bananes avous dès gotes do l' distilerîye Descampes di Djiblou èt do Porto avou dès cèrêjes
dins do l' gote, i faleûve yèsse solide, à quinze ans!
One saquî qui riyeûve padrî sès p'titès rondès bèlikes, avous sès-ouys à mitan sèrès, one saquî qu' aveûve bon,
c'èsteûve nosse Matante Adèle. Ele aveûve télemint d' plaîji, qui dji m' dimande asteûre, si ç' n'èsteûve nin on p’tit
djeu da lèye po nos r'çûre deûs côps, po l' mwins', dissu l' min.me djoûrnéye do Novèl-An èt po nos-ètinde,
one miète pus pompète à chaque côp, fè on disdût di tos lès diâles dissu s' pavéye en moussant foû ?
|
|
|
|
|
|
|
| © Georges Puissant. avri 2008
|
|
|
|
|
|